मेढा नगरपंचायत नगराध्यक्षपदी अनिल शिंदे यांची तर दत्तात्रय पवार यांची उपाध्यक्षपदी निवड ; आ. शिवेंद्रसिंहराजे भोसले यांनी वर्चस्व राखले

मेढा ( वार्ताहर ) संपुर्ण जिल्ह्याचे लक्ष लागून राहिलेल्या मेढा नगरपंचायत नगराध्यक्षपदी अनिल शिंदे तर उपाध्यक्षपदी दत्तात्रय पवार यांची निवड करण्यात आली.
मेढा नगरपंचायतीवर पुन्हा एकदा सातारा जावलीचे आमदार शिवेंद्रसिंहराजे भोसले यांचे वर्चस्व सिद्ध झाल्याचे या निवडीमुळे पहावयास मिळाले. राष्ट्रवादी काँग्रेस पक्षाचे वतीने लढविलेल्या या निवडणुकीत नगरसेवक अनिल शिंदे यांना १२ मते तर शिवसेनेच्या निलम जवळ यांना ५ मते मिळाली त्यानंतर झालेल्या उपाध्यक्ष पदाच्या निवडीवेळी राष्ट्रवादी कॉग्रेस पक्षाच्या कल्पना जवळ यांनी ऐनवेळी शिवसेना पक्षाच्या पाठींब्याने निवडणुक लढवली तसेच अपक्ष उमेदवार दत्तात्रय पवार यांनी राष्ट्रवादीच्या पाठींब्यावर अर्ज दाखल केला परंतु गटातटाच्या वादात आणि आ. शिवेंद्रसिंह राजे भोसले यांनी केलेल्या मदतीने अखेर दत्तात्रय पवार यांना जादा मते मिळाली आणि त्यांनी विजय मिळविला.
सहा. निवडणुक निर्णय अधिकारी यांच्या उपस्थितीत या निवडणुका पार पडल्या. मेढा नगरपंचायतीच्या या निवडींमुळे राष्ट्रवादी कॉग्रेस पार्टीला विजय मिळाला परंतु या पुढे नक्की काय घडणार , राष्ट्रवादीच्या या निवडीचे पडसाद पुढे चालू राहणार कि पक्षांतर्गत कारवाई होवून अजुन सस्पेंन्स वाढणार याकडे सर्वांचे लक्ष लागले आहे.